ಕಾಡಿಗೆ ರಕ್ಕಸ ರೈಲು!

An elephant crossing the railway line at Panijhora in Buxa Tiger Reserve in Dooars 

ಒಂದು ಬಲಿಷ್ಠ ಸುಂದರ ಕುದುರೆ. ಹುಟ್ಟಿನಿಂದಲೇ ಪಡೆದ ನಾಯಕತ್ವದ ಗುಣ, ವಿವೇಕ, ಸನ್ನಡತೆ ಸ್ವಾಭಾವಿಕವಾಗಿಯೇ ಕುದುರೆಗಳ ಗುಂಪಿನ ನಾಯಕನನ್ನಾಗಿಸಿತು. ಇಂತಹಾ ಕುದುರೆ ಮಾನವನ ದುರಾಸೆಗೆ ಸೆರೆಸಿಕ್ಕಿ ಇತರ ಕುದುರೆಗಳೊಡನೆ ಮರದ ದಿಮ್ಮಿಗಳನ್ನೆಳೆಯುತ್ತಾ, ಉಕ್ಕಿನ ಹಳಿಗಳನ್ನೆಳೆಯುತ್ತಾ, ಕೊನೆಗೆ ರೈಲಿನ ಎಂಜಿನನ್ನೂ ಎಳೆಯುತ್ತಾ ದುಡಿಯುವಾಗ ಅಸ್ತಂಗತನಾಗಲಿರುವ ಸೂರ್ಯನೆಡೆಗೆ ಆಕಸ್ಮಿಕವಾಗಿ ನೋಡುತ್ತದೆ. ಥಟ್ಟನೆ ಸ್ಫುರಿಸುವ ಸತ್ಯವೆಂದರೆ ಈ ಹಳಿಗಳು, ಈ ಎಂಜಿನ್ನು ತಲುಪಲಿರುವುದು ತನ್ನವರ ಆವಾಸ ಸ್ಥಾನವನ್ನು! ಎಚ್ಚೆತ್ತ ಕುದುರೆ ನಾಗಾಲೋಟದಿಂದ ಓಡಿ ಮಾನವ ನಿರ್ಮಿತವೆಲ್ಲವನ್ನೂ ಧ್ವಂಸಮಾಡಿ ತನ್ನನ್ನೂ, ತನ್ನವರನ್ನೂ ಬಿಡುಗಡೆಗೊಳಿಸಿಕೊಂಡು ಸ್ವತಂತ್ರವಾಗುವ ಕಥೆಯೇ ಡಿಸ್ನಿ ಮೂವಿಸ್‌ರವರ ಅನಿಮೇಷನ್ ಚಿತ್ರ “ ಸ್ಪಿರಿಟ್: ದ ಸ್ಟಾಲಿಯನ್ ಆಫ಼್ ಸಿಮರನ್”. ಇದರಲ್ಲಿ ಸ್ಪಿರಿಟ್ ಮತ್ತಿತರ ಕುದುರೆಗಳನ್ನು ಮಾನವನು ಕೈವಶ ಮಾಡಿಕೊಳ್ಳುವುದು, ಅವುಗಳ ಬದುಕನ್ನೇ ತಲ್ಲಣಗೊಳಿಸುವುದು ಅಭಿವೃದ್ಧಿ ಎಂಬ ಮರೀಚಿಕೆಗಾಗಿ. ೮೦ರ ದಶಕದ ಈ ಚಿತ್ರವು ಸುಮಾರು ೨೦೦ ವರ್ಷಗಳ ಹಿಂದಿನ ಅಮೆರಿಕದ ವಸಾಹತು ನೀತಿಗಳನ್ನೂ, ತನ್ಮೂಲಕ “ಅಭಿವೃದ್ಧಿ ಪಥ”ವೆನಿಸಿರುವ ರೈಲ್ವೆ ಸಂಪರ್ಕವನ್ನೂ ಹೇಗೆ ಜೀವಿಮಾರಕವಾಗಿದ್ದುವೆಂಬುದನ್ನು ಹೃದಯಸ್ಪರ್ಷಿಯಾಗಿ ಕಟ್ಟಿಕೊಡುತ್ತದೆ. ಸ್ಪಿರಿಟ್‌ನ ಸ್ವಾತಂತ್ರ್ಯ ಪ್ರೇಮಕ್ಕೆ ಮರುಳಾಗುವ ಮಕ್ಕಳ ಅಚ್ಚುಮೆಚ್ಚಿನ ಈ ಚಿತ್ರವನ್ನು ಎಷ್ಟೇ ಬಾರಿ ನೋಡಿದ್ದರೂ ಮತ್ತೆ ಮತ್ತೆ ನೋಡಬೇಕೆನಿಸುತ್ತದೆ. ಮಾನವರ ದೇಹಭಾಷೆ, ಹಾವ-ಭಾವದಷ್ಟೇ ಪರಿಣಾಮಕಾರಿಯಾಗಿ ಕುದುರೆಗಳೂ ವ್ಯಕ್ತಪಡಿಸಿವೆ.

ರೈಲ್ವೆ ಮಾರ್ಗಕ್ಕಾಗಿ ಹಳಿಗಳನ್ನು ಹಾಕುವಾಗ ಆಗುವ ಅರಣ್ಯ ನಾಶ, ವನ್ಯಜೀವಿಗಳ ಆವಾಸ ಪಲ್ಲಟ ಮೊದಲಾದುವನ್ನು ಕಣ್ಣಿಗೆ ಕಟ್ಟಿಕೊಡುವ ಈ ಚಿತ್ರವು, ಕೇಂದ್ರ ಸರ್ಕಾರದ ರೈಲ್ವೆ ಬಜೆಟ್ ಮಂಡನೆಯ ಸುದ್ದಿಗಳ ಮೂಲಕ ಮತ್ತೊಮ್ಮೆ ನೆನಪಾಯಿತು. ಬ್ರಿಟಿಷರ ಆಳ್ವಿಕೆಯ ಮುಂದುವರೆದ ಭಾಗವೋ ಎಂಬಂತೆ ಹೊಸ ಮಾರ್ಗಗಳನ್ನು ಕಲ್ಪಿಸಲಾಗುತ್ತಿದೆ. ಸೂಕ್ಷ್ಮ ಅರಣ್ಯ ಪ್ರದೇಶಗಳನ್ನು ಹಾದುಹೋಗಲಿರುವ ರೈಲ್ವೆ ಮಾರ್ಗಗಳನ್ನು ಅರಣ್ಯಗಳಿವೆಯೆಂದೇ ಹಿಂದಿನ ಸರ್ಕಾರಗಳು ಹಾಕಿರಲಿಲ್ಲ. ಮೈಸೂರು- ಕುಶಾಲನಗರ, ಮೈಸೂರು - ಸತ್ಯಮಂಗಲ, ನಂಜನಗೂಡು- ನೀಲಂಬೂರು ಇತ್ಯಾದಿ ಮಾರ್ಗಗಳ ಪ್ರಸ್ತಾವನೆಯಲ್ಲಿ ಎಷ್ಟು ಹೆಕ್ಟೇರ್ ಅರಣ್ಯ ಪ್ರದೇಶ ಯಾರು ಯಾರ ಪಾಲಾಗಲಿದೆ ಎಂಬುದನ್ನು ಆಲೋಚಿಸಬಹುದು. ಈಗಾಗಲೇ ರಸ್ತೆ ಮೂಲಕ ಸಂಪರ್ಕಗಳನ್ನು ಹೊಂದಿರುವ ಈ ಪ್ರದೇಶಗಳು ಸಾಕಷ್ಟು ಮುಂದುವರೆದಿವೆ. ರೈಲ್ವೆ ಸಂಪರ್ಕದ ಅವಶ್ಯಕತೆಯನ್ನೊಮ್ಮೆ ಪುನರಾವಲೋಕಿಸಬೇಕಿದೆ.

ಸಂರಕ್ಷಿತಾರಣ್ಯಗಳ ಮೂಲಕ ಹಾದು ಹೋಗುವ ಹೆದ್ದಾರಿಗಳಲ್ಲಿ ರಾತ್ರಿ ಸಂಚಾರದಿಂದ ಆಗುತ್ತಿರುವ ವನ್ಯಜೀವಿಗಳ ಹನನವನ್ನು ತಡೆಯುವುದೇ ದುಸ್ತರವಾಗಿರುವಾಗ ಯಾವುದೇ ಅಡೆತಡೆಗಳಿಲ್ಲದೆ, ವಿಶೇಷ ನಿಯಮಾವಳಿಗಳನ್ನುಳ್ಳ ರೈಲ್ವೆ ಸಂಚಾರ ಎಷ್ಟು ಮಾರಕ ಎಂಬ ಸತ್ಯವನ್ನು ಮನಗಾಣಬೇಕಿದೆ. ಒಮ್ಮೆಲೇ ಬೊಬ್ಬಿರಿವ ರೈಲಿನ ಹಾರನ್‌ಗಳಿಂದ   ಎಷ್ಟು ವನ್ಯಜೀವಿಗಳು ಕಂಗೆಟ್ಟಾವೋ, ಅವುಗಳ ಸಂತಾನೋತ್ಪತ್ತಿಯ ಮೇಲೆಂಥಾ ದುಷ್ಪರಿಣಾಮವು ಬೀರೀತೋ! ಅವುಗಳ ಜೀವನ ಪದ್ಧತಿಯಲ್ಲಿ ಎಂತೆಂತಹ ಮಾರ್ಪಾಡುಗಳು ಬಂದು ಅವುಗಳ ಸ್ವಾಭಾವಿಕ ವಿಕಸನಕ್ಕೆ ಮಾರಕವಾದಾವೋ! ಇದ್ಯಾವುದರ ಬಗ್ಗೆಯೂ ಯಾವುದೇ ಅಧ್ಯಯನ ನಡೆಸದೆ ಮನವ ಕೇಂದ್ರಿತ “ಅಭಿವೃದ್ಧಿ”ಗಾಗಿ ತೀರ್ಮಾನ ಕೈಗೊಳ್ಳುವುದು ಎಷ್ತು ಸೂಕ್ತವೆಂಬುದಕ್ಕೆ ಪಶ್ಚಿಮ ಬಂಗಾಳದಲ್ಲಿ ಸಿಲಿಗುರಿ ಬಳಿಯ ರೈಲ್ವೆ ಪಥವೇ ನಿದರ್ಶನ.

Guwahati-bound Somporkkranti Express, hit the elephant a few miles from Alipurduar in West Bengal.

‘ಇಂಟೆರ್ನ್ಯಾಷನಲ್ ಎಲೆಫ಼ೆಂಟ್ ಫ಼ೌಂಡೇಷನ್’ ಸಂಸ್ಥೆಯು ಬೆಂಗಳೂರಿನ ಭಾರತೀಯ ವಿಜ್ಞಾನ ಸಂಸ್ಥೆಯ ಸಹಯೋಗದೊಂದಿಗೆ ನಡೆಸಿದ ವೈಜ್ಞಾನಿಕ ಸಮೀಕ್ಷೆಯ ವರದಿಯ ಪ್ರಕಾರ ಕಳೆದ ೪೦ ವರ್ಷಗಳಲ್ಲಿ( ೧೯೭೪- ೨೦೧೩ ರವರೆಗೆ) ವಯಸ್ಕ, ಬಾಲ ಹಾಗೂ ಮರಿಯಾನೆಗಳೂ ಸೇರಿದಂತೆ ೮೨ ಆನೆಗಳು ಅತಿವೇಗದಿಂದ, ಅಂದರೆ ಗಂಟೆಗೆ ೮೦ ಕಿ.ಮೀ. ವೇಗದಲ್ಲಿ ಚಲಿಸುವ ರೈಲಿಗೆ ಸಿಕ್ಕಿ ಸತ್ತಿವೆ. ಬ್ರಾಡ್‌ಗೇಜು ನಿರ್ಮಾಣವಾದಮೇಲಂತೂ ಈ ಆನೆಗಳ ಸಾವಿನ ಸಂಖ್ಯೆಯು ಹೆಚ್ಚಳವಾಗಿದೆ. ಗುಲ್ಮ- ಸಿವೊಕ್, ಸಿವೊಕ್ - ಬಗರಕೋಟೆ, ಊಡ್ಲಬಾರಿ - ಡಂಡಿಂ, ಮಾಲ್- ಚಾಲ್ಸಾ, ಬನಾರ್ಹತ್, ದಲಗಾಂವ್, ಹಸಿಮಾರ ಮೊದಲಾದ ಸ್ಥಳಗಳಲ್ಲಿನ ರೈಲ್ವೆ ಹಳಿಗಳ ನಡುವೆ ರೈಲಿಗೆ ಸಿಕ್ಕಿ ಪ್ರಾಣ ತೆತ್ತ ಪ್ರಾಣಿಗಳು ಆನೆಗಳಷ್ಟೇ ಅಲ್ಲ, ಕಾಟಿಗಳು, ಕಡವೆ ಇತ್ಯಾದಿ ವನ್ಯಜೀವಿಗಳೂ ಸೇರಿವೆ. ೨೦೧೩ರ ನವೆಂಬರ್ ೧೩ರಂದು ಒಂದೇ ಅವಘಡದಲ್ಲಿ ೪೦-೫೦ ಆನೆಗಳು ರೈಲಿಗೆ ಸಿಕ್ಕಿ ೫ ವಯಸ್ಕ, ೨ ಮರಿಯಾನೆಗಳು ಸಾವನ್ನಪ್ಪಿ, ಹತ್ತು ಆನೆಗಳು ತೀವ್ರ ಗಾಯಗೊಂಡಿವೆ. ಪೂರ್ಬಶಾಯರ್ಬರಿ ಎಂಬಲ್ಲಿ ೪ ಆನೆಗಳು ರೈಲಿಗೆ ಸಿಕ್ಕಿ ೨೦೧೫ರ ಮೇ ೮ರಂದು ಒಂದು ಆನೆ ಸತ್ತಿದೆ. ೨೦೧೪ರ ಜುಲೈ ೨ರಂದು ಅಲಿಪುರ್ದುವರ್ ಬಳಿ ಎರಡು ವಯಸ್ಕ ಆನೆಗಳು ರೈಲಿನಿಂದ ಜಜ್ಜಿಹೋಗಿವೆ. ಲೆಖ್ಖ ಬರೆಯಲು ತೊಡಗಿದರೆ ಅದರದೇ ವರದಿಯಾದೀತು! ಮಹಾರಾಷ್ಟ್ರ ರಾಜ್ಯದಲ್ಲೂ ಆನೆ, ಚಿರತೆ ಮತ್ತಿತರ ಪ್ರಾಣಿಗಳು ರೈಲಿಗೆ ಸಿಕ್ಕಿ ಸಾವನ್ನಪ್ಪಿವೆ. ರಾಜಾಸ್ಥಾನದ ಕೋಟಾ ಬಳಿ ರಾಜಧಾನಿ ಎಕ್ಸ್ಪ್ರೆಸ್ಸ್ ರೈಲಿಗೆ ಸಿಲುಕಿ ಸತ್ತ ‘ಬ್ರೋಕನ್ ಟೈಲ್’ ಹುಲಿ ರಣತಂಬೂರು ರಾಷ್ಟ್ರೀಯ ಉದ್ಯಾನದಿಂದ ಸುಮಾರು ೨೦೦ ಕಿ.ಮೀ. ದೂರ ಕ್ರಮಿಸಿತ್ತು!

Leopard hit near Pench tiger reserve at Madhya Pradesh

ಇಷ್ಟೆಲ್ಲಾ ಚರ್ಚಿಸುವಾಗ ರೈಲ್ವೆ ಮಾರ್ಗಗಳ ಅವಶ್ಯಕತೆಯೇನು ಎಂಬ ಪ್ರಶ್ನೆ ಎದುರಾಗುತ್ತದೆ.ಮೇಲ್ನೋಟಕ್ಕೆ ಜನಸಾಮಾನ್ಯರ ಸಂಚಾರಕ್ಕಾಗಿ ಕೈಗೆಟುಕುವ ದರದ ಸಂಪರ್ಕ ಸಾಧನವೆನ್ನಿಸುವ  ರೈಲು ಹೆಚ್ಚಾಗಿ ಉಪಯೋಗವಾಗುವುದು ಸರಕು ಸಾಗಣೆಗಾಗಿ. ಸರಕುಗಳು ಸಾಗಣೆಯಾಗುವುದು ಕಚ್ಚಾವಸ್ತುಗಳು ದೊರಕುವ ಪ್ರದೇಶಗಳಿಂದ ಕೈಗಾರಿಕಾ ಪ್ರದೇಶಗಳಿಗೆ ಮತ್ತು ಒಂದು ಕೈಗಾರಿಕಾ ಪ್ರದೇಶದಿಂದ (ಕಚ್ಚಾ ವಸ್ತು) ಮತ್ತೊಂದು ಕೈಗಾರಿಕಾ ಪ್ರದೇಶಕ್ಕೆ (ಸಿದ್ಧವಸ್ತು).

 

MahanadaExpress passenger hit near Kolkata

 ಎನ್.ಸಿ.ಎಫ಼್. ನ ಡಾ. ಸಂಜಯ ಗುಬ್ಬಿಯವರು ಹೇಳುವಂತೆ ಕೊಡಗು, ಕೇರಳದಂತಹ ಸ್ಥಳಗಳ ಕಾಫ಼ಿ, ಟೀ ಎಸ್ಟೇಟುಗಳ ಮಾಲೀಕರಿಗೆ ಸವಾಲಾಗಿರುವ ಕೂಲಿ ಕಾರ್ಮಿಕರ ಸಮಸ್ಯೆ ಮತ್ತೊಂದು ಸಂಭವನೀಯತೆ. ಸ್ಥಳೀಯವಾಗಿ ತುಟ್ಟಿಯಾಗಿರುವ ಅಥವಾ ಬಹುತೇಕ ಅಲಭ್ಯವಿರುವ ಕೂಲಿ ಕಾರ್ಮಿಕರ ಸೇವೆಯು ಬಲುದೂರದ ರಾಜ್ಯಗಳಿಗೆ ಸಂಪರ್ಕ ಕಲ್ಪಿಸುವ ರೈಲ್ವೆ ಮಾರ್ಗಗಳ ಮೂಲಕ ಬಿಹಾರ, ಉತ್ತರ ಪ್ರದೇಶ ಮೊದಲಾದ ರಾಜ್ಯಗಳಿಂದ ವಲಸೆ ಬರುವ ಕಾರ್ಮಿಕರಿಂದ ಅಗ್ಗದ ಸೇವೆಯು ಲಭ್ಯವಾಗುವುದು. ಕಾರಣವೇನೇ ಇರಲಿ, ಕಾಡಿನ ಮಧ್ಯೆಯೇ ಏಕೆ ರೈಲು ಮಾರ್ಗವೆಂಬ ಪ್ರಶ್ನೆಗೆ ಅವರ ಉತ್ತರ , ನೇರ ದಾರಿ, ಸರಳ ಭೂಸ್ವಾಧೀನ ಪ್ರಕ್ರಿಯೆ ಮತ್ತು ಕಡಿಮೆ ವೆಚ್ಚ ಮೊದಲಾದ ಕಾರಣಗಳು. ಉತ್ತರ ಕೇರಳದಲ್ಲಿ ಅಂತರರಾಷ್ಟ್ರೀಯ ವಾಯುಸಂಪರ್ಕವಿಲ್ಲದಿರುವುದರಿಂದ ಮೈಸೂರಿನಲ್ಲಿ ಅಂತಹ ಸೌಲಭ್ಯ ದೊರಕಿದ್ದೇ ಆದಲ್ಲಿ ರಾಷ್ಟ್ರೀಯ ಉದ್ಯಾನದ ಮೂಲಕ ಓಡಾಟ ಸುಲಭವಾಗಬಹುದೆಂಬ ಕಾರಣವೂ ಇರಬಹುದು. ಏನೇ ಇರಲಿ, ಅಭಿವೃದ್ಧಿ , ಸಂಪರ್ಕಗಳನ್ನು ಬಯಸುವವರು ಕಾಡಿನೊಳಗೆ ತೂರಿಸಾಗುವಬದಲು, ಹೊರಗಿನಿಂದಲೇ ಮಾರ್ಗಗಳನ್ನು ನಿರ್ಮಿಸಿಕೊಂಡರೆ ಒಳಿತು. ಕೆಲವೇ ಮಂದಿಯ ಹಿತಕಾಯುವ ಈ ಮಾರ್ಗಗಳು ನಾಡಿನ ಜೀವಾಳವಾಗಿರುವ ಶುದ್ಧ ಗಾಳಿ, ಮಳೆ - ಇವುಗಳನ್ನು ಒದಗಿಸುತ್ತಿರುವ ಈ ದೇಶದ ವಿಸ್ತೀರ್ಣದ ಕೇವಲ ಶೇಕಡ ೫ ಭಾಗ ಮಾತ್ರವಿರುವ ಸಂರಕ್ಷಿತಾರಣ್ಯಗಳನ್ನು ಹೊರತುಪಡಿಸಿದರೆ ಸಾಕು. ಲಾಭಕರ ಉದ್ಯಮವಾಗಿ ಮಾರ್ಪಾಡಾಗಿರುವ ರೈಲ್ವೆ ಇಲಾಖೆಯು ಈ ಅಂಶಗಳನ್ನು ಗಮನಿಸಿ ನಾಗರಿಕ ಸೇವಾ ಇಲಾಖೆಯಾಗಿಯೇ ಉಳಿಯಲಿ ಎಂಬುದೇ ವನ್ಯಜೀವಿಗಳ ಹಿತಪರವಿರುವವರ ಕಾಳಜಿ. ಅಭಿವೃದ್ಧಿ ಬೇಕು, ಆದರೆ ವನ್ಯಜೀವಿಗಳ, ಕಾಡಿನ ಬೆಲೆ ತೆತ್ತು ಆಗುವುದು ಬೇಡ.ಪರಿಸರ, ಅರಣ್ಯ ಹಾಗು ಹವಾಮಾನ ಬದಲಾವಣಾ ಸಚಿವಾಲಯವು ಇಂತಹ ಹಾನಿಕಾರಕ ಯೋಜನೆಗಳಿಗೆ ಸಮ್ಮತಿಸದಿರಲಿ. 

Another hit by train

ಮೈಸೂರು ಅಮೆಚೂರ್ ನ್ಯಾಚುರಲಿಸ್ಟ್ ಸಂಸ್ಥೆಯ ಮನು. ಕೆ ಅವರು ಹೇಳುವಂತೆ, ಒಂದೆಡೆ ಆಂಧ್ರ ಪ್ರದೇಶದ ನೂತನ ರಾಜಧಾನಿ ಅಮರಾವತಿಯನ್ನು ನಿರ್ಮಿಸಲು ಸರ್ಕಾರಗಳು ೪೦೦ ಹೆಕ್ಟೇರ್ ಅರಣ್ಯ ಪ್ರದೇಶ್‌ವನ್ನೇ ಡೀನೋಟಿಫ಼ೈ ಮಾಡಿದರೆ, ಮತ್ತೊಂದೆಡೆವನ್ಯಜೀವಿಗಳಿಗೆ ಕಾರಿಡಾರ್ ಕಲ್ಪಿಸಲು ಮತ್ತು ಪರಿಸರ ಪ್ರವಾಸೋದ್ಯಮ( ಈಕೋ ಟೂರಿಸಂ) ಕ್ಕಾಗಿ ವಿದೇಶಿ ನೇರ ಹೂಡಿಕೆ (ಎಫ಼್,ಡಿ.ಐ) ಯನ್ನು ಆಹ್ವಾನಿಸುತ್ತಿವೆ. ಈ ದ್ವಂದ್ವ ತಾಕಲಾಟಗಳ ಮಧ್ಯೆ ನಲುಗುವುದು ಲಕ್ಷಾಂತರ ವರ್ಷಗಳಿಂದ ಬಾಳಿದ ಪರಿಸರ ಮತ್ತು ಅಲ್ಲಿನ ಜೀವಿಗಳು.ಸುಮಾರು ೧೫ ವರ್ಷಗಳಷ್ಟು ಹಿಂದೆ ಶ್ರೀಶೈಲಂನಲ್ಲಿಒಂದು ಸಣ್ಣ ಸಂರಕ್ಷಿತಾರಣ್ಯವನ್ನು ಸೃಷ್ಟಿಸಿ, ಕಾಣೆಯಾಗಿದ್ದ ಹುಲಿ, ಆನೆ ಮೊದಲಾದ ವನ್ಯಜೀವಿಗಳನ್ನು ಆಹ್ವಾನಿಸಿದ್ದ ಅದೇ ಆಂಧ್ರ ರಾಜ್ಯ ಇಂದು ಅದೇ ಜೀವಿಗಳ ಆವಾಸವನ್ನು ದೊಡ್ಡ ಪ್ರಮಾಣದಲ್ಲಿ ವಿನಾಶಪಡಿಸುತ್ತಿರುವುದೊಂದು ವಿಪರ್ಯಾಸವೇ ಸರಿ.

An elephant killed in Assam

 ಅರಣ್ಯದ ಕಾನೂನುಗಳ ಪರಿಧಿಗೇ ಬರದ ಸುವರ್ಣ ಚತುಷ್ಪಥ ಈಗಾಗಲೇ ರಾಷ್ಟ್ರೀಯ ಉದ್ಯಾನಗಳನ್ನು ಹೊಕ್ಕು ಬಳಸಿದ್ದಗಿದೆ. ಕಾಡಿನಲ್ಲಿ ಇಷ್ಟೆಲ್ಲಾ ಕೈಯಾಡಿಸುವ ಮಾನವ, ರೈಲಿನಲ್ಲಿ ಸರಕು ತುಂಬಿ ಕಾಡಿನ ಮಧ್ಯೆ ಸಂಚರಿಸುವಾಗ ಇನ್ನೇನೆಲ್ಲಾ ಮಾಡಬಹುದು ಎಂಬ ಆತಂಕ ಎದುರಾದರೆ ಸೂಕ್ತ ಪರಿಹಾರ ಮಾರ್ಗಗಳೂ ಕಾಣದಾಗಿವೆ.

A tiger hit by train in Madhya Pradesh

Elephant family crossing railway track in West Bengal

ಅಮೆರಿಕೆಯ ಬುಡಕಟ್ಟೂ ಮೂಲ ನಿವಾಸಿಗಳಲ್ಲಿ ಕೊನೆಯವನಾದ ಯಾಹಿ ಸಂಸ್ಕೃತಿಯ ‘ಇಶಿ’ ಹೇಳುವಂತೆ ನಿರ್ಮಲ, ಪ್ರಶಾಂತ ಕಾಡಿನ ನಡುವೆ ಸಂಚರಿಸುವ ‘ದೈತ್ಯ ರಾಕ್ಷಸ’( ಮಾನ್ಸ್‌ಟರ್) ರೈಲು!

-   ಗೀತಾ. ಎಚ್.    

ಹಸಿರು ಹೆಜ್ಜೆ

ಮೈಸೂರು      

Chittals on the railway track

         

Lion on the railway track at Gir

(All Photo credits: Various sources from Google search)